|
Shlomo Ahe w Ahwotho,
1 Nisen Brixo! cal kulxu.
Bu athro 1 Nisen, ahna an nacime, aydarbo mcaydinawole b Turcabdin? Ged
mahkeno hkeye acle eno hesh nacimo bi madrashto sharwayto...
Manwe acmi me hawroni, haw kothe l boli. At tretayna, kumarno uzzanowo bu
senef dat tlotho. Cemrayna kibowe 9-10 shne. I naqqayo i madrashto bi
baladiyewa. I baladiye, meqem mu Sayfo cito dak kaldoyewa. Ketwola maqbara b
hasa, bi xasra de khayro laf Astel.
Safre d 1 Nisen, ahna an nacime, be i masale menyo, galabe kayiso
udcinawola. Mawxa shaterwan bawxa masalokat. Qayminawo safro galabe xayifo,
hesh meqem d cubrina li madrashto.
Hawxa safre d 1 Nisen qayimina w azzan eno w hawri lu farmo du cammo Shabe d
ketwe taht mu xan deb Cammo Galush. At tre hawrone men ged saymina, hesh
meqem b yawmo mhadarwolan. Azzan baroyo lu farmo. Safro, kmisem lahmo
shahino; talme rabe, nacime, lahmo ftiho...
U cammo Shabe qem du farmowe, ketwole rawsho du lahmo, manfaqwo lahmo w
macbarwo laysho l gawe du farmo. Ketwole sedriye hewerto qume... farmo
shahino, i shanthayde mehyowa bi fotho...
Merlan lu cammo Shabe: Shlomo Cammo Shabe! Madcarle: B shayno! men kubacxu
nacime? Kelle hzalxu, ucdo manfaqli u lahmo shahino...
Madcarlan: Cammo Shabe halan tlamtho d lahmo w halawe acme...
U lahmo du farmo, cam i halawe galabe basimowe... hengi d uxlinawo lahmo du
tanuro, galabe naqlat besamwolan bu lahmo du farmo, heworo rakixo w
basimowe. Du tanuro, lawno dah hete w dayem qawyo w nashifo huwewo. Meqem mu
muklayde, bu femo lucsinawole galabe bu femo.
U cammo Shabe omer: Abri mayna lahmo kubacxu, kito tlamtho, w kit du ruco,
kit lahmo ftiho, halawe meqqa? madcarlan: Halan tlamtho rabtho w acma mathe
w hamshi (250) gramat d halawe.
Omer: De kelle u lahmo qumayxu, mnaqawu tlamtho, ged tuqalnolxu halawe bi
mizen. Mabramle hase, medle mi tanagaye di halawe bu shalfo halawe, mahtole
cal kagat w mahtole bi mizen. Ahna ste medlan tlamtho d lahmo. Tqile w
huwlelan i halawe ste. Eno w hawri cam hdode b ha femo emmina: cammo Shabe 1
b Nisen! W mahzamlan, nafeqina mu farmo l larwal.
Rahet u cammo Shabe bethrayna, omer: Alo ged mahetno 1 b Nisen b emayxu! W
kemsacer sucre galabe pesin w kothe bethrayna. Eno w hawri caberina lu xan.
Bu xan ketwo galabe noshe, mdayaclan i tase cal ruhayna ... U cammo Shabe
saleq hul li dekkano d Selo Bomba. Tamo meqqa d karex le hzelelan. Ema
bether dacer lu farmo ladecina.
Eno w hawri dacerina li madrashto, axilan hen mu lahmo w mi halawe, u mede d
zayed tlelan w caberina l lawgel. I naqqa d hawi fersa, amtelan u lahmo w i
halawe d fayisho huwolan lah hawrone hrene w hawxa msafewolan u lahmo w i
halawe d amtewolan mu farmo du cammo Shabe.
Hawxa mcayadwolan 1 b Nisen.
1 Nisen Brixo!
|
